日本酒的四大分類 - 薰、爽、醇、熟

日本酒侍酒研究會品鑒超過20,000種清酒,依據香氣與風味的組合為清酒建立了四種類別 – 分別係「薰酒」、「爽酒」、「醇酒」、「熟酒」

日本酒的四大分類 - 薰、爽、醇、熟

日本清酒的四大類別

一路以黎同大家解鎖過唔少清酒既基本知識,但有一個領域一路都未同大家講解過 ,今堂就大家解構一下,佢就係清酒既品飲。而作為品酒入門基礎知識 ,首先要認識清酒既四大基本分類。日本酒侍酒研究會品鑒超過20,000種清酒,依據香氣與風味的組合為清酒建立了四種類別 – 分別係「薰酒」、「爽酒」、「醇酒」、「熟酒」,亦即係大家可能都有聽過人地所講既「薰爽醇熟」。

日本清酒的四大類別
日本清酒的四大類別 (圖片來源:sakejapan)

大家可以先望一望上圖,根據「香氣強弱」同「口感濃淡」,大概可以將清酒歸入去呢4類,以下落黎就為大家分別介紹一下佢地各自既特性。


1. 薰酒 (くんしゅ)

呢類清酒香氣強度好高,味道較為清淡,你通常會享受到華麗既水果香氣甚至乎花香,甘酸味平衡。呢類酒好多時都會係啲吟釀同大吟釀級別既清酒,10-15度飲用配搭一啲刺身或者壽司享用最為適合。

推薦清酒

大嶺20/21年新版本 2粒 火入れ山田錦 720ml

大嶺20/21年新版本 2粒 火入れ山田錦 720ml
味道:甜美像白桃一樣的醇厚香氣
配搭:適合配搭刺身、壽司、白身魚等比較淡味食物的餐中酒


2. 爽酒 (そうしゅ)

呢類酒既重點就如字面既意思一樣,就係爽!淡淡清新既香氣,味道清爽無負擔,飲用呢類酒唔難飲到青草味或者蔬菜味,口感收結清脆。本釀造、生酒好多時都會係爽酒,5-10度既冰凍溫度飲用就最正,可以配搭既食物種類非常廣,大家可以放膽去試。

推薦清酒

樂器正宗 本釀造 中取り 720ml

樂器正宗 本釀造 中取り 720ml
味道:入口充滿果香感,甘酸平衡,收結清爽暢快
配搭:配搭油膩食物如天婦羅、打邊爐、串燒等尤其出色


3. 醇酒 (じゅんしゅ)

醇酒口感上會比較濃郁,如果你品嘗到香濃既旨味,好大機會都係佢。醇酒味道一般比香氣豐富,甘味、酸味、苦味會不斷喺你口入面擴散開去。純米酒、生酛酒、山廢酒都係呢類酒既常客,醇酒最適合40度前後享用。冬意漸濃,暖一壺酒黎飲,襯返啲煮魚呀豚角煮呀就Fit哂!

推薦清酒

赤武 純米 秋酒 (ひやおろし) 720ml

赤武 純米 秋酒 (ひやおろし) 720ml
味道:入口會感到米香旨味,再慢慢地顯現出甜味,尾段辛口
配搭:烤物、串燒


4. 熟酒 (じゅくしゅ)

最後黎到熟酒,香氣同味道都非常濃郁,通常會散發住乾果或者香料既熟成芳香,甚或係花雕味,旨味相當豐富。熟酒都離不開長期熟成酒或古酒,比較推薦常溫飲用,再配啲脂肪多又或者濃味少少既菜式。

推薦清酒

英勲 純米古酒 Vintage 1998 300ml

英勲 純米古酒 Vintage 1998 300ml
味道:優雅的金黄色和醇美的熟成香氣
配搭:大閘蟹、打邊爐、壽喜燒等比較濃味的食材和料理


能夠分辨「薰爽醇熟」有助你配搭合適既食物,搵適合既溫度飲用,更可以揀選到正確既飲用酒具,大家如果對酒具有興趣就記住緊貼住我地既資訊呀。大家閒時飲清酒既時候不妨多啲嘗試分辨手上飲緊既酒係邊一類,反覆練習,清酒的味道千變萬化,仲有好多空間等緊大家去探索㗎。

Simon Siu
酒蛙 Sakewa的創辦人之一。深信日本酒有如藝術品般的獨特價值,偏愛清酒米旨味。

相關文章