簡易清酒配餐指南 – 調和篇

有無諗過清酒都可以做food pairing?其實論配餐能力,清酒比起紅白酒既真係有過之而無不及,以下落黎就同大家講解一下。

簡易清酒配餐指南

香港作為美食之都,個個都係美食家,西餐既food pairing我諗好多人都聽過。近年深受日本文化影響,相信大家出街食飯既時候,日本料理已經係好多人既首選,但有無諗過清酒都可以做food pairing?其實論配餐能力,清酒比起紅白酒既真係有過之而無不及,以下落黎就同大家講解一下。

清酒用米作為原料,旨味濃郁,同海鮮、肉類配搭起上黎可謂相得益彰。清酒既配酒大致分為三種: 「調和」、「相乘」和「削除」,今日主要會同大家講吓最普遍既方法 — 「調和」。「調和」意思係揀酒既時候,會選擇同食物有相似味道或者風格既酒,以下我地㨂左四款大家最受歡迎既日本料理作為例子。


1. 刺身

推薦清酒種類:吟釀酒

刺身
配搭刺身推薦清酒種類:吟釀酒

一講起食日本野,刺身 (Sashimi) 絕對係「家常便飯」,雖然刺身有咁多款,但味道基本上都係鮮味同清淡,小心唔好揀味道太重既酒作為搭配,以免搶走刺身既鮮味。因此,大部分人都會揀啲吟釀級別既酒黎做搭配。所謂吟釀酒係指純米大吟釀、純米吟釀、大吟釀同吟釀呢4類,風格上大致都係以果香為主,味道清淡怡人,可以保留刺身既鮮味。

推薦配搭清酒:
京姫 匠 純米大吟釀
磯自慢 EMERALD 一滴入魂 東條山田錦 純米大吟釀
寫樂 備前雄町 純米吟釀


2. 天婦羅

推薦清酒種類:本釀造酒

天婦羅
配搭天婦羅推薦清酒種類:本釀造酒

食完刺身,接住落黎大家都會食返幾款天婦羅,相對刺身黎講,天婦羅味道會重一啲,吟釀酒既果香會被搶走,反而平價少少既本釀造先係比較好既配搭。天婦羅油脂感較重,口感清爽既本釀造就適合不過。

推薦配搭清酒:
樂器正宗 本釀造 中取り
十四代 本丸 特別本釀造


3. 煮物

推薦清酒種類:純米酒

煮物
配搭煮物推薦清酒種類:純米酒

煮物菜式林林種種,關東煮、咖喱、椰菜豬肉卷、味噌煮魚等等,全部都有著濃郁既鮮味,而要襯托得起呢份甜美既鮮味,純米酒既米味香濃,會係比較好既選擇。純米酒飲用溫度非常廣泛,如果你經常都係冷飲清酒的話,不妨可以熱燗純米酒飲用,別有一番風味。

推薦配搭清酒:
翠玉 特別純米酒
寫樂 雄山錦 純米酒
而今 特別純米火入れ


4. 燒肉

推薦清酒種類:生酛酒、山廢酒

燒肉
配搭燒肉推薦清酒種類:生酛酒、山廢酒

呢款放喺爐火上面燒既肉類通常比較乾,肉味香濃,最適合配以生酛、山廢酒飲用,呢兩款釀酒方式運用自然力量產生乳酸,口感順滑,飲落有著一種討好既乳酸味,可以一解燒肉既油膩感之餘,濃郁既酒體亦同肉味好夾!

推薦配搭清酒:
新政 生成 Ecru 生酛純米酒
久保田 雪峰 純米大吟釀 山廢仕込
新政 No.6 S-type 純米 生原酒
久保田 碧壽 純米大吟釀


知道大家一定會話「日本咁多款料理,淨係講四樣邊度夠呀」,坦白講其實呢篇只係旨在簡單介紹比一眾清酒新手們一啲基本既清酒配餐概念,我地以後一定會繼續同大家分享更加多既配餐技巧同心得!等大家可以同我地一齊食得招積、飲得出色。

Simon Siu
酒蛙 Sakewa的創辦人之一。深信日本酒有如藝術品般的獨特價值,偏愛清酒米旨味。

相關文章